असोज १५, ढोरपाटन । गाउँभरमा काम गर्ने जनशक्ति नहुँदा खेतीयोग्य जमिन वनमाराले ढाक्दै जान थालेको छ । गाउँ छोड्नेको सङ्ख्या दिनप्रति दिन बढ्दै छ । काठेखोला गाउँपालिका–२ भीमापोखराका बलबहादुर केसी भने यही स्थितिमा बागलुङको गाउँमै व्यावसायिक बाख्रापालन गर्दै आएका छन् ।

केसी एक दशक बढी विदेशमा पसिना बगाएर स्वदेश फर्किएका हुन् । उनी भन्छन् “अहिले आफ्नै गाउँठाउँ र पाखापखेरा प्यारो लाग्न थालेको छ, जीवनको ऊर्जाशील समय त विदेशमा बितिहाल्यो।” अहिले उनी बिहान उठेदेखि राति नसुतुञ्जेलसम्म बाख्राको स्याहारसुसारमा व्यस्त हुन्छन । १२ वर्ष साउदी अरबमा साहुको भेडा चराउने काम गरेएका उनी अहिले आफैँ मालिक बनेका छन् ।

गाउँमै उनले आधुनिक खोर निर्माण गरी व्यावसायिक बाख्रापालन थालेका छन । बोयर र स्थानीय दुबै जातका गरी हाल केसीको खोरमा ४५ वटा बाख्राहरु छन् । उनले बाख्रा खरिद र खोर निर्माण गर्दा करिब रु १५ लाख लगानी गरेका छन् ।  अहिले उनले वार्षिक २० वटासम्म बोका बिक्री गर्दै आएको छन भने एउटा बोकाको रु २० देखि ३० हजारसम्म बिक्री हुने गरेको छ ।

उनी भन्छन्, “व्यावसायिक तरकारी खेती होस वा पशुपालन युवाका लागि प्रसस्त आयआर्जनको स्रोत यही रहेको छ। ” केसीले चार वर्षदेखि बाख्रापालनमा थालेका र गाउँमा गर्ने कामले नै आत्मसम्मान मिल्ने गरेको बताउछन् । उनले ‘केसी कृषि तथा पशुपालन फार्म’ दर्ता गरेर बाख्रा पालन गर्दै आएका छन । खसी बोका उत्पादन गर्नसके बजारको कुनै समस्या नहुने उनको अनुभव छ ।

केसीले अहिले बाख्रापालनसँगै मल प्रयोग गर्ने गरी तरकारीमा गोलभैँडा खेती समेत सुरु गरेका छन । उनको यही कार्यलाइ गाउँपालिका कार्यालय र वडा कार्यालयले रु ५०-५० हजार अनुदानसमेत दिएको छ । उक्त रकमबाट उनले खोर व्यवस्थापन तथा तारबार गरेको छन । 

• न्युज बहार संवाददाता