साउन २६, काठमाडौँ । प्रहरीले भक्तपुरबाट १५ लाख बराबरको नक्कली नोट बरामद गरेको छ ।
चाँगुनारायण नगरपालिका-४ चाँगु बुढाथोकी गाउँबाट प्रहरी प्रभाग चाँगुनारायण र प्रहरी वृत्त थानकोटको संयुक्त टोलीले बिहीबार साँझ १५ लाख बराबरको नेपाली नक्कली नोट बरामद गरेको हो ।
प्रहरी टोलीले १५ लाख रुपैयाँसहित ९ जनालाई पक्राउसमेत गरेको छ । प्रहरीले उनीहरू सबै माथी नक्कली नोट कारोबारमा संलग्न भएको आशंकामा अनुसन्धान भइरहेको जनाएको छ ।
उनीहरु टोली नै मिलेर चाँगु बुढाथोकीगाउँस्थित ४० वर्षीय अर्जुन सुवेदीको डेरामा नक्कली नोट छाप्ने कार्य समेत गर्दै आएका खुलेको छ । प्रहरीले उक्त कोठाबाट कम्प्युटर एक थान, कलर प्रिन्टर एक थान, चार वटा स्कुटर र मोबाइल १२ थान समेत बरामद गरेको जनाएको छ ।
- न्युज बहार संवाददाता
