भदौ ९, काठमाडौँ । आज आइतबार साताको पहिलो कारोबार दिन नेप्स परिसूचक घटेर बन्द भएको छ । यसदिन नेप्से परिसूचक ७९.८८ अंक (२.६८ प्रतिशत)ले घटेर २८९४.५७ विन्दुमा बन्द भएको छ।

यस दिन नेप्से घटेपनि कारोबार रकम भने अघिल्लो दिनको तुलनामा बढेको छ। बजारमा यस दिन ३३३ स्टकको २ लाख १८ हजार ५७८ पटकको कारोबारमा १९ अर्ब ७४ करोड ५ लाख ९३ हजार रुपैयाँ बराबरको ४ करोड २६ लाख ८६ हजार कित्ता शेयर खरिदबिक्री भएको छ।

आज घटेको बजारमा पनि ३ स्टक विन नेपाल लघुवित्त, उपकार लघुवित्त र आत्मनिर्भर लघुवित्तको शेयर सकारात्मक सर्किट लेभलमा कारोबार भएको छ  भने यस दिन मन्दाकिनी हाइड्रोपावरको शेयरमूल्य करिब १० प्रतिशतले घटेको छ।

यस दिन कारोबार रकमका आधारमा अपि पावर शीर्ष स्थानमा रहेको छ। उक्त कम्पनीको आज ८४ करोड ६८ लाख रुपैयाँ बराबरको शेयर खरिदबिक्री भएको छ।

आज कारोबारमा आएका १३ उपसमूह मध्ये १२ उपसमूहको परिसूचक घटेको छ भने एक उपसमूहको परिसूचक मात्र बढेको छ । यस दिन १.०८ प्रतिशतले लघुवित्त उपसमूहको परिसूचक बढेको छ। यस दिन सर्वाधिक ३.८३ प्रतिशतले लगानी उपसमूहको परिसूचक घटेको छ। 

• न्युज बहार संवाददाता