भदौ ८ काठमाडौँ । वीरगञ्जमा हैजाले नयाँ प्रकोपको रुप लिएको छ । शुकबार देखि आज सम्म वीरगञ्जमा ४४ जनामा हैजा पुष्टी भइसकेको छ । विभिन्न अस्पतालमा उपचाररत १२९ जना बिरामीमध्ये ४४ जनामा हैजा संक्रमण पुष्टि भएको हो ।
यही क्रममा झाडापखलाको लक्षण देखा परेर उपचार गराउन आएका दुई व्यक्तिको मृत्युसमेत भइसकेको छ । मृत्यु भएका उनिहरुमा हैजाको संक्रमण भने पुष्टि नभएको अस्पताल स्रोतले जनाएको छ । विज्ञहरूका अनुसार खानेपानी पाइपमा ढलको दूषित पानी मिसिँदा हैजा फैलिएको आशंका छ ।
अहिले हैजा प्रभावित विभिन्न ११ स्थानका पानीका नमुना संकलन गरी परीक्षणका लागि काठमाडौँको टेकुस्थित स्वास्थ्य विज्ञान प्रयोगशाला पठाइएको छ भने त्यसको रिपोर्ट आज आउने प्रयोगशालाले जनाएको छ ।
जनस्वास्थ्य कार्यालय पर्साका अनुसार वीरगञ्ज महानगरपालिका-११, १२, १३ र १६ मा हैजाको प्रकोप फैलिँदा वीरगञ्जका अस्पतालहरूमा बिरामीको चाप बढिरहेको छ भने पछिल्लो १० वर्षयता पहिलो पटक वीरगञ्जमा हैजाको प्रकोप देखिएको हो ।
- न्युज बहार संवाददाता
