साउन ५, काठमाडौँ । ललितानिवास जग्गा प्रकरणमा पक्राउ परेका मीनबहादुर गुरुङसहित तीन जनालाई थुनामुक्त गर्न सर्वोच्च अदालतले अस्वीकार गरेको छ ।
आज सर्वोच्च अदालतका न्यायाधीश नहकुल सुवेदी र प्रकाशकुमार ढुंगानाको संयुक्त इजलासले मीनबहादुर गुरुङ, सुधीरकुमार शाह र धर्मप्रसाद गौतमको बन्दी प्रत्यक्षीकरणको रिट खारेज गरेको हो ।
यही असार १३ मा हदम्याद नाघिसकेको घटनाको अनुसन्धानमा आफूहरुलाई गैरकानूनी रुपमा पक्राउ गरेको भन्दै उनीहरु बन्दी प्रत्यक्षीकरणको रिट लिएर ललितानिवास प्रकरणमा सर्वोच्च अदालत गएका थिए ।
तर आज न्यायाधीशद्वय ढुंगाना र सुवेदीको संयुक्त इजलासले थुना गैरकानुनी नभएको ठहर गरेको छ । उनीहरु माथी सरकारी छाप दस्तखत किर्ते र संगठित अपराधको कसुसको अनुसन्धानका सिलसिलामा पक्राउ पूर्जी जारी भएको र जिल्ला अदालत, काठमाडौंबाट अनुसन्धानका लागि म्याद लिएर अनुसन्धान भइरहेकाले थुना गैरकानुनी नभएको न्यायाधीशद्वय ढुंगाना र सुवेदीको संयुक्त इजलासले ठहर गरेको छ ।
- न्युज बहार संवाददाता
