कार्तिक १६, काठमाडौँ । आइतबारबाट तिहारको लागि राष्ट्र बैंकले सुनका असर्फी र चाँदीका सिक्काको बिक्री सुरु गर्ने भएको छ।

आगामी आइतबार (कात्तिक १९ गते) देखि २४ गतेसम्म राष्ट्र बैंकले सिक्का बिक्री गर्ने भएको हो। 

बैंकको टक्सार महाशाखाका प्रमुख थानेश्वर आचार्यले २.५ ग्राम, ५ ग्राम र १० ग्रामका सुनका सिक्का बिक्री गर्न लागेको बताएका छन।

राष्ट्र बैंकले बिक्री गर्ने चाँदी र सुन दुवै उच्च कोटीको ९९९ टचको हुने जनाइएको छ।

सामान्य भाषामा यसलाई २४ क्यारेटका सुन-चाँदी भन्ने गरिन्छ । यसरी राष्ट्र बैंकले बिक्री गर्ने सुनको मूल्य भने हरेक दिन सुन चाँदी व्यवसायी महासंघले तोके अनुसार परिर्वतन हुने छ भने चाँदीका सिक्काको मूल्य भने तोकिसकिएको छ। 

१० ग्राम सिक्काको मूल्य १ हजार ६ सय रूपैयाँ र २५ ग्राम सिक्काको मूल्य ४ हजार रूपैयाँ तोकिएको छ। राष्ट्र बैंकले गाई, गणेश र गजलक्ष्मी अंकित चाँदीका सिक्का बिक्री गर्न लागेको हो। 

• न्युज बहार संवाददाता