माघ २१, काठमाडौँ । क्यान्सरविरुद्धको विभिन्न सचेतनामूलक कार्यक्रम गरी आज विश्व क्यान्सर दिवस मनाइँदैछ । हरेक वर्षको फेब्रुअरी ४ तारिखका दिन यो दिवस मनाइन्छ । नेपालमा पनि यस वर्ष ‘बढ्दैछ चुनौती क्यान्सरको, पहुँच बढाऔँ स्याहारको’ भन्ने नाराका साथ विभिन्न सचेतनामूलक कार्यक्रम गरी यो दिवस मनाइँदैछ ।

सन् २०२२ मा करिब एक करोड व्यक्तिको मृत्यु क्यान्सर रोगका कारण भएको विश्व स्वास्थ्य सङ्गठन (डब्लुएचओ)ले जनाएको छ ।  क्यान्सर रोगबाट हुने मृत्युमध्ये पनि करिब एकतिहाइ सुर्तिजन्य पदार्थको प्रयोग, मदिरा सेवन, मोटोपन, शारीरिक क्रियाकलापको अभ्यास कमी र फलफूल तथा तरकारीको कम सेवनका कारण हुने गरेको डब्लुएचओले जानाएको छ ।

फोक्सोको क्यान्सर रोग सबैभन्दा धेरै देखिने क्यान्सर हो । यो बाहेक प्रोस्टेट, स्तन, कोलोरेक्टम, कलेजो, पेट र मूत्राशयमा क्यान्सर रोग बढी हुने गरेको छ । डब्लुएचओका अनुसार नेपालमा क्यन्सर रोगका बिरामीको यकिन तथ्याङ्क नभए पनि नेपालमा स्तन, पाठेघरको मुख र फोक्सोमा हुने क्यन्सरका कारण धेरै महिलाको मृत्यु हुने गरेको छ भने पुरुषमा पेट, फोक्सो र कलेजोमा क्यान्सर रोग बढी हुने गरेको छ । 

• न्युज बहार संवाददाता