माघ १, काठमाडौँ । आज माघ १ गते माघे संक्रान्ति पर्व मनाइँदैछ । माघ १ गतेलाई सूर्य धनु राशिबाट मकर राशिमा प्रवेश गर्ने सङ्क्रान्ति भएकाले मकर सङ्क्रान्ति पनि भन्ने गरिन्छ ।

माघ १ गतेलाई मगर र थारु समुदायले विशेष उल्लासका साथ मनाउने गरेका छन । आज काठमाडौँको टुँडिखेलमा उनीहरुले विशेष कार्यक्रम आयोजना गरी माघी मनाउँदैछन । आजको उक्त कार्यक्रममा प्रधानमन्त्री प्रचण्ड लगायतका विशिष्ट व्यक्तित्वलाई समेत निम्तो गरिएको छ ।

माघीलाई थारु समुदायले भने नयाँ वर्षको रुपमा मनाउने गरेका छन । माघ १ गतेदेखि थारु समुदायले नयाँ कामको थालनी गर्ने, गाउँको नयाँ नेतृत्व चुन्ने, नयाँ वर्षको योजना बनाउने लगायतका कार्यहरु गर्दछन् ।

आज माघे सङ्क्रान्तिका दिन प्रत्येकको घरमा घ्यू, चाकु, तिलका परिकार, तरुल, पालुङ्गो, खिचडी, सखरखण्ड आदि खाने प्रलन छ ।

माघ १ गतेलाई तराईवासीले नहान अर्थात् नुहाउने पर्वका रूपमा मनाउने गरेका छन । तराईवासीका मान्यता अनुसार वर्षभर नुहाउने वातावरण नमिल्नेले पनि आज भने अनिवार्य नुहाउनुपर्ने हुन्छ ।

• न्युज बहार संवाददाता