कार्तिक ११, बागलुङ । बागलुङका किसानहरु यतिबेला चिन्तित भएका छन । फल लागेको कागतीका बोट धमाधम मर्न थालेपछि किसान अहिले छटपटीमा छन। पछिल्लो दुई महिनायता कागतिको बोटमा ढुसीको प्रकोप देखिएपछि कागतीका बोट मर्न थालेका हुन् । 

यहाँका स्थानीय किसान सयौँको हजारौँ बोट कागती मर्दा लाखौँको क्षति हुने भन्दै चिन्तित भएका छन् । कृषि ज्ञान केन्द्र बागलुङका सूचना अधिकारी कुमार पुन मगरले किसानले लगाएको कागतीमा ढुसी र गवारो रोग लाग्दा बोट मर्न थालेको बताउँछन । 

पुन मगरका अनुसार गवारो रोगले कागतीका बोटको टुप्पो सुक्दै जाने र बोटनै मर्ने गरेको छ । उनले तत्काल सुक्न थालेका हाँगालाई किसानले समयमै काटेर फाले बोट मर्नबाट जोगिने बताएका छन ।

पुन मगरले प्रायः कागतीमा लाग्ने यो रोग समय–समयमा देखा पर्ने हुँदा किसानले प्राविधिक परामर्श लिएर यसको रोकथाम गर्न सकिने सुझाव दिएका छन ।

बागलुङ जिल्लामा मात्र हाल ४५ हेक्टर क्षेत्रफलमा कागती खेती गरिएको छ । कृषि ज्ञान केन्द्रका अनुसार पछिल्लो समय कागती खेतीतर्फ किसानको आकर्षण बढ्दै गएको छ भने हाल जिल्लामा २२ हेक्टर जमिनबाट कागती उत्पादन भइरहेको छ ।

• न्युज बहार संवाददाता