मंसिर २७, पर्सा । चिसो बढेसँगै पर्साजिल्लामा ज्वरो, रुघाखोकी र श्वासप्रश्वासका बिरामी बढ्दै जान थालेका छन् । केही दिनयता बढेको शीतलहर र चिसोका कारण ग्रामीण बस्ती र सहरी क्षेत्रमा श्वासप्रश्वास, रुघाखोकी तथा ज्वरोका बिरामी ह्वात्तै बढेका हुन् ।
जिल्ला स्वास्थ्य कार्यालय पर्साका अनुसार वीरगञ्जस्थित प्रभु अस्पताल, नारायणी अस्पताल, बयोधा अस्पताल नेपाल मेडिसिटी लगायत ग्रामीण भेगका स्वास्थ्य संस्थामा अहिले बिरामीको चाप बढेको छ । दुधेबालकदेखि वृद्धवृद्धा निमोनिया, ज्वरो, रुघाखोकी र श्वासप्रश्वासको समस्याबाट पीडित भएका छन् ।
नारायणी अस्पतालका सूचना अधिकारी डा उदयनारायण सिंहले पछिल्लो केही दिनयतादेखि बढेको चिसोका कारण अस्पतालमा बिरामीको चाप बढेको जानकारी दिएका छन । उनले निमोनिया, रुघाखोकी र ज्वरो लगायतका बिरामी दैनिक ३० देखि ४० जनासम्म उपचारका लागि अस्पताल आउने गरेको बताए । डा सिंहका अनुसार अस्पतालमा बिरामीको चाप बढ्दै गएपछी शय्याको अभाव भएको र अहिले भुइँमै राखेर उपचार गर्नुपर्ने अवस्था रहेको छ ।
- न्युज बहार संवाददाता
