मंसिर २३, कैलाली । सुदूरपश्चिममा पछिल्लो समयमा स्वास्थ्य बीमा गराउनेको सङ्ख्या क्रमशः बढेको छ। बीमा बोर्डले सरकारी स्वास्थ्य संस्थामा उपचार गराउँदा उपचारमा लागेको खर्च व्यहोर्ने भएपछि बीमा गराउने सङ्ख्या बढ्दै गएको हो ।

स्वास्थ्य बीमा बोर्ड सुदूरपश्चिमका प्रमुख रमेन्द्रप्रसाद कुशवाहले सुदूरपश्चिममा स्वास्थ्य बीमा कार्यक्रममा समावेश हुनेको सङ्ख्या क्रमशः बढिरहेको बताएका छन । अहिलेसम्म सदूरपश्चिममा स्वास्थ्य बीमा गराउनेको सङ्ख्या पाँच लाख ४२ हजार तीन सय ७३ पुगेको उनले बताए ।

स्वास्थ्य बीमा बोर्डले बिमित परिवारका सदस्य बिरामी हुँदा रु एक लाख बराबरको उपचार शुल्क अस्पताललाई भुक्तानी गर्छ । सर्वसाधारणको स्वास्थ्य बीमामा आकर्षण बढ्नुको कारण सरकारी अस्पतालमा उपचार सेवा सहज  हुनुलाई पनि लिइएको छ ।

अति गरिब, ज्येष्ठ नागरिक, एचआइभी÷एड्स सङ्क्रमित, महिला स्वास्थ्य स्वयंसेविका, अतिअशक्त अपाङ्गता भएका व्यक्तिलाई भने सरकारले निःशुल्क बीमा गर्ने गरेको जनाइएको छ ।

• न्युज बहार संवाददाता