फागुन १३, काठमाडौँ । आजदेखि दादुरा–रुबेला खोप अभियान सुरु  भएको छ । आजदेखि चैत्र ७ गतेसम्म सो खोप अभियान स्वास्थ्य तथा जनसङ्ख्या मन्त्रालयले सञ्चालन गरेको हो ।

यस अभियानमा विगत एक वर्षमा दादुरा रोगको महामारी भएको स्थान र दादुरा रोगका बिरामीको उमेरलाई विश्लेषण गरेर दादुरा–रुबेला खोप प्रदान गर्ने लक्षित समूहको आधारमा जिल्लालाई २ समूहमा विभाजन गरिएको छ ।

राष्ट्रिय खोप कार्यक्रम दादुरा–रुबेला खोप अभियान २०८०–२०८१ कार्यक्रम सञ्चालन निर्देशिका अनुसार पहिलो समूहमा काठमाडौँ उपत्यकाभित्रका ३ जिल्ला र दादुरा–रुबेलाका लागि उच्च जोखिम भनी पहिचान गरिएका तराईका २१ जिल्ला गरी २४ जिल्ला रहेका छन भने दोस्रो समूहमा बाँकी ५३ जिल्ला रहेको छ ।

९ महिनादेखि ५ वर्ष मुनिका बालबालिकाको यो अभियान मार्फत नियमित खोपको अवस्था पहिचान गरेर छुट खोपको मात्रा प्रदान गरिने छ ।

मन्त्रालयले आफ्नो पायक पर्ने खोप केन्द्रको नाम र सञ्चालन हुने मिति र उमेर समूहबारे थाहा पाउन महिला सामुदायिक स्वास्थ्य स्वयंसेविका वा नजिकैको स्वास्थ्य संस्था वा वडा कार्यालयमा सम्पर्क गर्न आग्रह गरेको छ । ५ वर्ष मुनिका बालबालिकालाई छुट नियमित खोप पनि दिइने मन्त्रालयले जनाएको छ । त्यसैले नियमित खोप छुटेको भए खोप केन्द्रमा जाँदा नियमित खोप कार्ड पनि लिएर जानसमेत मन्त्रालयले आग्रह गरेको । 

• न्युज बहार संवाददाता